Connect to Us LinkedIn Youtube RSS

04-2013 - Business Plaza tabata un exito completo!
  • PDF
  • Print
  • Email

Oranjestad - Diasabra, 19 di januari ultimo a tuma lugar Camara di Comercio (KvK) su segundo edicion di Business Plaza, yama Step Forward! E evento tabata dirigi ariba empresario cu kier expande nan negoshi y a ofrece un programa extenso pa duna tur tipo di informacion cu empresarionan tin mester. Business Plaza a wordo realisa danki na sponsor di 4 oficina di accounting, esta Ernst & Young, Deloitte y PricewaterhouseCoopers, kendenan tabata golden sponsor, y KPMG, cu tabata silver sponsor.

E programa tabata inclui varios presentacion y workshops durante henter dia y a wordo habri door di Presidente di Camara di Comercio, Sr. Jamal Mahawat Khan, kende a papia tocante e importancia di inovacion continuo di producto y servicio pa negoshi y economia di nos pais. Tambe e la menciona con empresario por usa tecnologia nobo na nan ventaha y con tecnologia por yuda nan deal cu reto, pero tambe cu oportunidad.

Despues director ehecutivo di Camara di Comercio, Sr. Leo Maduro a conta mas tocante e plannan di KvK pa 2013. Tambe tabatin varios instancia presente pa duna informacion y empresarionan interesa por a atende dos diferente workshop durante dia, esta Administration & Financial bookkeeping cual a wordo duna door di Ernst & Young y Business Plan cu a wordo ofreci door di Omega Consultancy. Durante refreshment breaks, empresarionan presente a haya oportunidad perfecto pa netwerk.

E final di e Business Plaza tabata e introduccion di “Europe meets the Americas”, cu ta un evento cu ta ideal pa empresario presente cu kier pa nan negoshi crece internacionalmente. E evento a wordo introduci door di Minister President, Sr. Mike Eman, ken a papia di e importancia di mantene e lasonan cu Reino Hulandes, y cu pa Aruba ta un oportunidad pa demonstra su valor agrega den Reino door di organisa un evento grandi asina. “Europe meets the Americas” lo tuma lugar di 5-8 mei, 2013. Durante e evento lo match entrepreneur di Europa cu empresario di Latino America, treciendo tur tipo di oportunidad empresarial tambe pa entrepreneur di Aruba, kendenan tambe por haya contacto cu e companianan bishitante of por sirbi como intermediairio entre e companianan di e diferente paisnan. Pa mas informacion bishita www.eumeetstheamericas.com.

Camara di Comercio kier bisa danki na tur e profesionalnan cu a coopera pa e Business Plaza bira un exito, notaris Rodriguez-Taekema, Sr. Fritz Isreal, Sr. Ryan Maduro, Sr. Ryan Kock, Sr. Freddy Vargas y Sra. Enrita Werleman pa e presentacionnan interesante duna na e publico. Tambe danki na e representatenan di Free Zone Aruba NV, Servicio di Impuesto, Cuerpo di Aduana, Departmento di Asunto Economico, Ernst & Young y Omega Consultancy.

Por ultimo, Camara di Comercio kier anuncia na tur esnan cu kier cuminsa cu nan negoshi, cu e Business Plaza, Get started, ta na caminda. Keda pendiente!

Aruba, 24 di januari 2013
Camara di Comercio y Industria (KvK)

 

By orbitalnets.com