Connect to Us LinkedIn Youtube RSS

18-2012 - KvK: Evita pago innecasario na 2013
  • PDF
  • Print
  • Email

Oranjestad – Pa medio di esaki Camara di Comercio y Industria (KvK) ta trese na conocimento di tur empresa cu tin nan contribucion anual (jaarlijkse bijdrage) pendiente ainda pa aña 2012, pa paga esaki preferiblemente promer cu dia 31 di december di e aña aki. Esaki ta conta mas ainda pa e negoshinan cu a cancela nan actividadnan durante e aña aki of den añanan anterior, y esnan cu no ta desea di continua cu nan negoshi.
Si cancela un eenmanszaak of VOF promer cu 1 di januari 2013, no tin obligacion pa paga contribucion anual pa e aña nobo (2013). Pero, manera 2013 cuminsa, KvK ta obliga pa ley pa cobra e contribucion anual completo pa e aña nobo pa tur esnan registra. Pa evita gasto innecesario ta mihor pa paga anto promer cu aña termina.

Cancelacion di negoshi:
Ta recorda tur cliente cu pa cancela negoshi mester tuma na cuenta:
1. Eenmanszaken, Vennootschap onder Firma (VOF) : ora cu cancela e negoshi, registracion na KvK ta termina completamente y no ta keda ningun compromiso pendiente.
2. NV, AVV, VBA, Commanditaire Vennootschap (CV) y otro entidad cu personeria huridico manera coöperatieve vereniging y stichting cu negoshi: ora ta cera negoshi di e entidad, e persona huridico ta keda registra obligatoriamente, como persona huridico activo, sin negoshi. E haltura di e contribucion anual ta depende di e capital cu ta keda inverti den e entidad sin negoshi.
3. Si e entidadnan menciona bao di 2 cu ta persona huridico ta desea di termina nan registracion completamente, nan lo mester pasa pa liquida e persona huridico a traves di disolucion (ontbinding) di e persona. Pa esaki tuma lugar na un manera corecto, mester tuma na cuenta e stipulacionnan segun e statutonan di e compania. Mas informacion y conseho tocante e proceso di disolucion y liquidacion por ser obteni na KvK.

Documento necesario
Pa cancela negoshi mester efectua esaki solamente atraves di un persona autoriza, por ehempel doño, director of apoderado. Pa cancelacion mester pasa personalmente na KvK of por download formulario 13 di nos website http://www.arubachamber.com/forms. Entrega e formulario completamente yena y firma, e mester ta acompaña pa un copia di identificacion valido di e firmante, sea paspoort of cedula. Tene cuenta cu ora ta trata di un VOF, ta necesario pa tin firma di tur e partners (vennoten) ariba e formulario pa por completa e cancelacion. Ora ta trata di un persona huridico, mester presenta cu e notulen di e reunion general di accionista, unda e decision pa disolucion a tuma lugar.

Cancelacion di negoshi o otro cambio den dato di e compania no lo ser procesa si no cumpli cu tur obligacion, e.o. contribucion anual y autorizacion adecua pa apoderado. Tene cuenta cu e obligacion di pago stipula den art. 15 Ordenanza di Registro Comercial ta mara na e hecho di registracion na KvK y no ta depende di si e compania ta opera of no.

Pago
Por haci pago di e siguiente maneranan:
Pago via banco, online o via transfer order; nos cuentanan na diferente banco ta aparece abao riba home page di nos website: www.arubachamber.com
Pago na KvK: via swipe cu ATM card; via cheque y cash.
Por favor limita pago cash y cheque mas tanto posible.


Aruba, 14 di november 2012
Camara di Comercio y Industria (KvK)

 

By orbitalnets.com