Connect to Us LinkedIn Youtube RSS

16-2012 - Eleccion 2012 pa directiva di Camara di Comercio y Industria
  • PDF
  • Print
  • Email

Oranjestad – Den e lunanan venidero ta tuma lugar atrobe e proceso di eleccion di miembro di directiva di Camara di Comercio y Industria (KvK), segun un schedule fiho pa reemplaza e miembronan aki.
Pa un persona interesa y publico en general por haya sa kico ta spera di un candidato pa un puesto como miembro di directiva di KvK, nos ta resumi e tareanan di KvK: un entidad legal sui generis cu e tarea specifico – conforme e Ordenanza di KvK – pa representa comercio e industria di Aruba. E obligacionnan di KvK ta encera e.o. fungi como consehero oficial di Ministro di Asuntonan Economico pa loke ta trata asuntonan socio-economico y financiero, den interes di comercio e industria en general. Alavez e ta conseha e mandatario aki encuanto otorgamento di permiso di establecimento di negoshi. Den cuadro di su tarea KvK ta duna servicionan di informacion economico/comercial tanto na comunidad di Aruba como na exterior y ta presenta riba su propio iniciativa proposicion, recomendacion y consehonan pa Minister di Asuntonan Economico, tur esaki pa contribui na e desaroyo economico di Aruba. Fuera di esey, KvK tin cu cumpli cu e funcionnan y trabaonan asigna pa ley. Ehempel di esaki ta e encargo pa maneha e registro oficial di negoshi y fundacion di Aruba y e custodia den su archivo pa acceso publico di e cuentanan anual di N.V. nan cu tin obligacion legal pa deposita esakinan na KvK.

Pues un posicion como miembro di directiva di KvK ta encera yuda, voluntaria y gratuitamente cumpli cu tur e tareanan aki.
KvK a caba di clausura dia 15 di augustus ultimo e periodo den cual por a haci observacion o obhecion en cuanto e listanan di votador pa eleccion di directiva di KvK cual hunto cu e formulario di postulacion como candidato ya ta obtenibel na Secretariado di Camara di Comercio.
Entre dia 1 y 14 di november 2012 lo por entrega formulario di postulacion como candidato pa directiva di KvK. E periodo di candidatura aki ta pa eligi tres miembro pa un periodo di tres aña. E vacaturanan pa e periodo entrante 31 di december 2012 ta di e siguiente miembronan: J.G. Eman, L.T.M. Wever y O.V. Britten. Conforme e stipulacionnan den Ordenanza di Eleccion di KvK ta permisibel pa miembronan cu ta baha pone nan mes inmediatamente re-elegibel.

Eleccion di miembro di directiva KvK ta mara na entre otro e siguiente normanan legal:

 Pa ser elegi mester posee nacionalidad hulandes
KvK ta dispone di datonan di nacionalidad cu a ser entrega di personanan inscribi como propietario, director of firmante autoriza di un empresa registra. Si tin cambio den e nacionalidad (por ehempel pa esun hulandes) mester participa esaki (cu comprobante) na KvK.

 Candidatonan pa miembrecia mester tin 25 aña di edad cumpli y mester ta inscribi na Censo di Aruba pa por lo menos 2 aña consecutivo prome cu e fecha di eleccion.

E procedura di candidatura ta prescribi entrega di un formulario di candidatura, firma pa 15 votador cu ta sostene e candidato. E formulario aki, hunto cu documentonan comprobante, mester ser entrega personalmente dor di un di e firmantenan na Secretario di Comision Electoral entre 9’or pa 12’or di mainta na KvK durante e periodo di 1 pa 14 november proximo. Candidatonan pa Kleinbedrijf (companianan cu un capital deposita bao di Afl. 100.000) mester ser sosteni pa votadornan Kleinbedrijf y candidatonan Grootbedrijf (companianan cu un captial deposita di Afl. 100.000 of mas) pa e votadornan Grootbedrijf. Por consulta e listanan di votador riba nos website: www.arubachamber.com/about-the-chamber/organization


Aruba, 24 di october 2012
Camara di Comercio y Industria (KvK)

 

By orbitalnets.com