Connect to Us LinkedIn Youtube RSS

17-2012 - Otro mision comercial exitoso organisa pa Camara di Comercio
  • PDF
  • Print
  • Email

Oranjestad – E aña aki Camara di Comercio (KvK) a ricibi pa di cinco biaha un mision economico procedente di Colombia. E mision economico, encabesa pa Camara di Comercio Colombo Centroamericana y del Caribe (Camara CCCC), tabata na Aruba di diaranson 22 di augustus te cu diabierna 24 di augustus, 2012.

E mision tabatin como meta estrecha y mantene e lazonan comercial cu Aruba tin cu Colombia, cu ta un di e paisnan di enfoke pa loke ta trata relacion comercial internacional di nos pais. Colombia ta e di cinco pais mas importante di unda Aruba ta importa su productonan na 2010 y 2011.

Un grupo di 7 empresa Colombiano a bishita Aruba durante dos dia pa investiga oportunidad pa haci negoshi cu nos isla. E companianan presente tabata ofrece e.o. material di construccion, muebles, alimento, flor fresco y preserva, saco di plastic duradero y envase di plastic. Diferente empresario local a reuni cu e empresarionan di Colombia pa descubri oportunidad nobo.

Ademas di tin cita cu empresario local durante e match making meetingnan na KvK, e empresarionan di Colombia a probecha di bishita algun compania na Aruba tambe. E aña aki atrobe a mira un aumento di interes y di resultado concreto pa cu comercio entre Aruba y Colombia. Segun informe cu KvK a ricibi di Camara CCCC, e empresarionan Colombiano ta hopi satisfecho cu e empresarionan local cu nan siña conoce y hasta tin algun cu a cera deal caba.

Pa duna e empresarionan Colombiano un bista mas amplio di tur posibilidad cu Aruba por ofrece, a organisa diabierna mainta un sesion informativo tocante con pa inverti na Aruba. Durante e mainta aki diferente organisacion invita, Aruba Investment Agency (ARINA), Aruba Trade & Industry Association (ATIA), Departamento di Asunto Economico y Free Zone Aruba, a duna e participantenan mas informacion con nan por yuda empresarionan internacional haci negoshi cu Aruba of usa Aruba como hub pa exporta nan producto of servicio pa e region di Caribe of Europa.

Camara di Comercio ta contento cu e resultado di e mision aki, y aunke tabata trata di un delegacion chikito, toch comerciante di Aruba y esnan cu tabata di bishita tabatin exito cu e mision.

Aruba, 03 di september, 2012.
Camara di Comercio y Industria (KvK)

 

By orbitalnets.com