Connect to Us LinkedIn Youtube RSS

09-2012 - KvK: Pro y Contra di Molina di Biento
  • PDF
  • Print
  • Email

Oranjestad –  Den e turbulencia di ultimo simannan tocante e parke di molina di biento cu ta proyecta na Urirama,  Camara di Comercio (KvK) ta considera necesario pa intenta pone argumento banda di otro pa yega na un opinion bon funda y balanza. Pa esaki nos ta scoge pa enfoca riba e viabilidad economico y tecnico di e proyecto. Pa por pone esaki den perspectiva, ta necesario pa haya contesta riba cierto pregunta. Pa cuminza: con a bay realmente cu e proyecto existente na Vader Piet, ya cu esaki mester por sirbi como ehemplo pa e proyecto na Urirama.

Aunque publicamente no tin tanto conoci di e resultado economico di e proyecto na Vader Piet, durante  Dialogo Social aña pasa a bin na claridad cierto informacion al respecto. Por a conclui cu na un nivel di Afl. 18 cent pa KWh, cu WEB Aruba N.V. ta paga pa coriente for di e compania explotador di e molinanan, e ultimo aki tabata capaz di tin un “return on investment”  bastante bon, di manera cu pa gana back e inversion den un periodo relativamente cortico no a resulta un problema. E pregunta cu a bin dilanti e tempo ey tambe ta pakico nunca e prijs mas abao di electricidad for di e parke a ser pasa na e consumidor. E contesta riba esey tabata cu e beneficio di electricidad mas barata di molina di biento a ser usa pa absorba e aumento di prijs di coriente, cu segun WEB/Elmar lo a subi mas rapido ainda si no tabata pa e molinanan. Esaki pa motibo di aumento drastico di prijs di fuel oil. Nos por conclui cu esaki por bay ta e caso tambe cu e produccion di un eventual parke di molina nobo, cual lo no resulta necesariamente den un prijs mas abao pa e consumidor, mirando e futuro desaroyo riba mercado internacional di petroleo.

Por conclui cu e perspectivanan economico pa e empresa cu lo explota un segundo parke di molina ta en principio favorable, motibo pa cual tanto gobierno, WEB NV y e compania di molina di biento ta mustra ansioso pa yega na ehecuta e proyecto. Un pregunta cu ta surgi tambe ta pakico, si ta solamente perspectiva favorable tin, WEB Aruba NV mes no por a ehecuta e proyecto, locual lo sali e consumidor mas barata, ya cu awor tanto e explotador di molina, WEB y Elmar tur mester haci ganashi como empresa riba produccion y distribucion di coriente.

Awor algun aspecto tecnico. Motibo principal, segun por comprende, pa ubica e molinanan nobo na Urirama  ta e caracteristica di biento y e necesidad di garantiza stabilidad den e red di distribucion. E pensamento ta cu pa motibo di e distancia entre Vader Piet y Urirama, e probabilidad cu biento ta cay na mesun momento na ambos sitio ta mas chiquito.  Esaki lo mester facilita maneho di e balanza den e sistema di entrega di coriente, compara cu e situacion unda tur dos parke ta cay afor na mesun momento. Esaki ta importante pasobra maneha caida di repente di casi 40% di produccion total, loke e molinanan ta representa, semper lo keda un reto grandi, cu su riesgonan pa stabilidad di e sistema di distribucion.

Alternativa: energia solar?
E pregunta cu ta surgi ta pakico no ta duna mas prioridad na otro alternativa, manera por ehemplo energia solar. Esaki pa cuminsa lo ta bon ya cu mayoria di experto ta di acuerdo cu energia di fuente renovable ta funciona mihor den un mix adecua. Esaki pa compensa e desventaha cu cada un di nan tin: biento tey ora e tey, y energia solar tey solamente ora tin solo.
Den e dianan aki ta circula e noticia for di un pais manera Alemania, cu un poblacion di mas di 80 miyon persona, cu recientemente a logra yega na genera 50% di produccion diario di electricidad atraves di energia solar, produci pa miles di productor mediano y chiquito. Un programa extenso di inversion den estimulo di produccion na cas y na empresa, cu ta entrega nan coriente na e red di distribucion,  a logra esaki. Pa mas informacion tocante e noticia aki, por bay riba  website di KvK na: www.arubachamber.com/globalnews. Na Aruba e condicionnan climatico (mas solo) ta mucho mas favorable cu na Alemania, dunando perspectiva pa un produccion mucho mas rentable.

E argumento en contra cu semper ta bin dilanti ta e gastonan cu ta keda existi pa mantene e capacidad di reserva cual ta indispensable, e asina yama “spinning reserve”. Esaki ta en verdad un punto di atencion, ya cu e consumidor mester paga su parti di e costo di e sistema di reserva.  E realidad ta cu pa motibo di e aumento drastico di prijs di fuel oil, e relacion entre e gastonan fiho (inversion inicial, gasto di mantenimiento y renovacion) y e gastonan variable (pa gran parti gasto di fuel) a cambia considerablemente. E ta haci hopi diferencia si fuel oil ta costa US$ 40,  of mas di US$ 100 pa bari, cu e tendencia di yega den futuro hasta na US$ 150 of mas, mientras e gastonan fiho ta aumenta menos drastico. Pagando pa e reserva, e ganashi ta den minimaliza e gastonan variable cu awor ta pisa mas.

Na Aruba e consumo mayor ta durante dia ora cu un cantidad grandi di empresa y otro edificio ta consumi hopi coriente, mas cu tur cos pa opera airco. Stimula empresanan pa produci coriente cu energia solar ta favorable, pasobra e periodo di consumo (entre 8:00 di mainta pa 5:00 di atardi) ta cay hunto cu e periodo di produccion, loque ta haci cu no mester di un sistema caro di bateria (buffer) pa warda coriente. Tambe ta favorable cu energia solar ta mihor programable cu biento. Na Aruba, hasta riba dianan completamente nubla, e penetracion di rayo solar ta suficiente pa garantiza un bon produccion, mientras cu por sa di antemano ki ora e no ta disponible mas. Pa e productornan na cas tambe ta necesario pa por entrega nan coriente na e red, ya cu net durante dia na mayoria di cas no tin consumo di coriente, pa aki tambe evita e gastonan considerable di bateria pa almacena coriente. Tur esaki ta exigi un maneho distinto di esun aplica te awor.

Aparte di e consideracionan di indole social, cultural, di medio ambiente y di salubridad publico cu por tin en contra di un proyecto na Urirama, cualnan no lo ser trata aki, mester conclui cu en general no ta dunando e atencion necesario na otro alternativa, cu por trese un bon mezcla di diferente fuente, di cual energia solar ta solamente uno, cu por crea un bon balanza cu ta minimaliza e riesgo y desventahanan di cada opcion. Hunto cu esaki naturalmente e cambio di fuel oil pa gas natural ta keda un opcion importante, ya cu e diferencia di prijs entre fuel oil y gas natural awor y den futuro lo ta considerable. Finalmente, e pregunta grandi cu ta keda, tambe en vista di e riesgonan di balance ora aumenta produccion di electricidad via biento, ta si aumento di produccion via un segundo parke di molina ta e “next move” mas adecua cu tin disponible awor.    


Aruba, 06 di juni 2012
Camara di Comercio y Industria (KvK)

 

By orbitalnets.com