Connect to Us LinkedIn Youtube RSS

08-2012 - KvK ta apoya “Dia Internacional di Actividad Fisico”
  • PDF
  • Print
  • Email

Oranjestad – Manera a ser anuncia algun siman atras pa Fundacion Movemiento Ta Bida, dia 6 di juni venidero lo celebra na Aruba, Dia (Internacional) di Actividad Fisico. E dia aki tin como meta promove un estilo di bida mas saludable, den cual actividad físico tur dia ta un factor importante. Un parti considerable di nos poblacion, mescos na otro país na mundo, ta hiba un bida sinta, sin hopi movemento, loke no ta favorable pa nan estado físico y salud. Mal custumber den alimentacion ta haci e situacion mas grave ainda, hibando nos na sobrepeso y su consecuencia pa cu enfermedad cronico, manera problema di curason, presion halto, cancer, etc. Un di e maneranan pa propaga esaki ta atraves di promocion di 30 minuut di actividad físico tur dia, pa grandi y chiquito, hoben o persona di edad avanza.

Realmente e dia internacional a keda celebra caba dia 6 di april ultimo, pero pa motibonan di organisacion lo haci esaki na Aruba riba e fecha menciona. Di banda di Camara di Comercio (KvK) ta apoya e iniciativa aki completamente, ya cu esaki por contribui na un Aruba mas saludable, loke finalmente ta beneficia nos economia, pasobra hende saludable por ta mas productivo den nan trabao. Ademas un persona bon di salud por hiba un bida mas placentero y activo, loke ta contribui tambe na un bida personal mas satisfactorio.

Zumba na KvK
Pa no laga e apoyo na palabra so, KvK lo ta organizando un actividad propio riba 6 di juni. Durante dia 6 di juni na trabao mes lo tene un check up medico y fisico pa personal di KvK, loke KvK ta haciendo caba algun vez pa aña. Esaki ta inclui tambe consulta di masagista y dietista, si esaki ta desea. Banda di esaki lo organiza un actividad di movemento den e parking lot dilanti KvK, unda lo ta bay tin un evento di Zumba entre 5:30 y 6:30 pm, unda tur hende ta bon bini. Tambe lo tin ocasion pa cana of core rond di e parking lot, cu tin un caminda den forma di un 8, di 350 metro largo.
Ta extende un invitacion na tur persona, pero especialmente na personal di empresanan den vecindario di KvK, cu ta desea di haci uso di e oportunidad, pa bin “work out” diaranzon dia 6 di juni venidero,  riba parking lot dilanti Camara di Comercio, J.E. Irausquin Blvd. 10.

Mas actividad
Riba dia 6 di juni tin un variedad grandi di actividad físico ta tuma lugar na diferente lugar na Aruba, durante henter dia entre 8 or di mainta y 8 or di anochi, na cual tur persona por participa. Ta haci un yamada na tur empresa pa stimula nan empleadonan pa participa na un di e eventonan aki. Pa mas informacion tocante  e eventonan cu lo ta tumando lugar bao di auspicio di Fundacion Movemiento Ta Bida: yama tel. 5942546/7406587; of mail na: This e-mail address is being protected from spambots. You need JavaScript enabled to view it
Pa finaliza ta bon pa corda un y tur cu esaki lo ta solamente e inicio di actividadnan dedica na crea mayor consciencia di e importancia pa nos cambia nos estilo di bida pa uno mas saludable, atraves di actividad físico y bon nutricion.

Aruba, 29 di mei 2012
Camara di Comercio y Industria (KvK)

 

By orbitalnets.com