Connect to Us LinkedIn Youtube RSS

06-2012 - KvK Annual Business Dinner Meeting 11 mei "Aruba's future without the refinery"
  • PDF
  • Print
  • Email

Oranjestad – Camara di Comercio y Industria (KvK) ta celebrando su di 19  “Annual Business Dinner Meeting” dia 11 di mei proximo. En vista di e desaroyonan di ultimo lunanan riba tereno economico, principalmente e probable cierre definitivo di e refinería y e necesidad di busca alternativa economico, pa San Nicolas y Aruba,  KvK a tuma iniciativa pa duna e Dinner Meeting di e aña aki como tema:” Aruba’s future without the refinery”.  A pesar cu na e momentonan aki ainda gobierno ta haciendo esfuerzo pa mantene e refinería habri, tin indicacion fuerte cu Aruba mester prepara pa un futuro sin refinería, y por lo tanto tambe pa un rumbo nobo y positivo pa San Nicolas. E alternativanan ta diverso y lo mester pas den un plan total cu ta duna un claridad ki rumbo Aruba lo scoge den e añanan venidero. Contrario na añanan anterior unda tabata invita un “keynote speaker”, durante e Dinner Meeting aki lo bay tin un debate riba e tema menciona den forma di un panel, consistiendo di tres orador invita: Sr. Milton Berlinski, Sr. Harold Malmberg y Sra. Audrey Laclé.

Milton Berlinski, naci na San Nicolas, ta un persona bon conoci den mundo internacional financiero, cu a traha 25 aña cu e consorcio Goldman Sachs, saliendo como managing director di Goldman Sachs Group Inc. Milton Berlinski tin un grado di MBA di Wharton School of Finance di Universidad di Pennsylvania. E tin inversion haci na Aruba den diferente empresa y ta empeña pa haci lo posible pa crea alternativa economico pa Aruba.
Harold Malmberg ta un empresario bon conoci den nos comunidad, cu a experimenta tempo bon y tempo malo den nos economia, y a logra pone riba pia un di e empresanan mas destaca den nos sector turístico, y sigur lo tin un aporte fuerte den e debate aki.
Audrey Croes – Laclé ta un di nos empresarionan mas activo. Banda di dirigi su mes empresa, e ta activo den organisacion di empresario di centro di Oranjestad MAMBO, y ta conoci y respeta tambe pa su trabao social, como por ehemplo e iniciativa di “Adopt An Addict”, cu ta atendiendo e problema di e adictonan ambulante.

Pa e evento aki a haya colaboracion di Sra. Michele Brooks como moderador pa e debate. Michele Brooks, naci na Aruba, a traha hopi aña pa e cadena di Hyatt hotels y ta un specialista den Recurso Humano y cu amplio experiencia como orador publico.
Cada panelista lo haya un oportunidad pa trese dilanti loke nan ta considera importante den e cuadro aki, y depues lo pasa pa un debate entre nan, y despues lo tin oportunidad pa e publico presente tambe participa den e discusion publico aki di nos futuro economia.

A haci mas cambio den e formula di e Dinner Meeting, incluyendo mas entretenimiento durante e evento. Lo cuminza cu un cocktail cu musica di steel pan y ta clausura e anochi riba tononan bailable di Tsunami. E formula di e dinner lo ta un dinner buffet.  E aña aki pa promer biaha KvK ta reduci e prijs pa entrada cu tabata US$100,- na solamente Afl. 100,- sperando asina di haci e evento mas accesible pa tur interesado. Mas informacion tocante venta di carchi por haya via: tel. 5821120/5821566, ext. 34/41/29; email: This e-mail address is being protected from spambots. You need JavaScript enabled to view it of riba website di KvK: www.arubachamber.com
 

Aruba, 11 di april 2012
Camara di Comercio y Industria (KvK)

 

By orbitalnets.com