Kamer van Koophandel en Nijverheid Aruba | Chamber of Commerce and Industry Aruba

Oranjestad – Dia 22 di december 2011 Parlamento di Aruba a aproba e ley cu ta haci cambio den nos Codigo di Comercio (Wetboek van Koophandel) y den Ordenanza riba Registro Comercial (Handelsregisterverordening). Cu e cambionan aki Aruba ta cumpli cu algun di e deseonan principal di Financial Action Task Force (FATF) den su rapport di 2009, relaciona cu cierto riesgonan cu a keda señala den nos legislacion encuanto nos empresanan cu personeria huridico, esta NV, VBA y AVV.
FATF ta haya cu cierto documentacion basico mester ta deposita na un lugar unda autoridadnan y den cierto grado tambe publico, mester tin acceso na e informacion aki. Entre e cambionan principal tin e obligacion nobo pa tur NV y AVV pa deposita tur aña na Registro Comercial (na encargo di Camara di Comercio) nan cuenta anual (jaarrekening). Tambe a bin e obligacion pa NV, AVV y VBA pa deposita tur aña un copia actualiza di nan registro di accionista (aandeelhoudersregister).

E ley aki ta bin na vigor 1 di januari 2012 pa loke ta su contenido en general. Sin embargo, durante tratamento di e ley den Parlamento, gobierno a introduci un Nota di Cambio, den cual ta posterga e fecha cu e ley ta bin na vigor pa e obligacion di deposita cuenta anual y di registro di accionista, te dia 1 di januari 2013. E obligacion di deposita cuenta anual ta conta pa tur NV y AVV, mientras pa VBA e ta existi caba desde aña 2009 tempo cu a introduci e forma legal aki. E obligacion di deposita registro di accionista ta un obligacion nobo pa tur e tres formanan legal cu nos conoce.
E fecha nobo di 1 di januari 2013 ta conta pa e companianan funda prome cu dia 1 di januari 2012. E companianan funda desde 1 di januari 2012 ta mantene e obligacion di deposita ambos documento dentro di ocho luna despues cu nan aña economico (boekjaar) termina.
Pa mayoria di empresa e aña economico ta core hunto cu e aña di calender, loke significa cu mester percura pa entrega e cuenta anual pa mas tarda 8 dia despues cu e keda aproba pa e Asamblea General di Accionista y en todo caso dentro di ocho dia despues cu e periodo di aprobacion termina. E copia di registro di accionista mester ta entrega tambe dentro di ocho luna cu e aña economico di e empresa termina. Pa mayoría esaki tambe lo ta anto fin di augustus como ultimo fecha.

Cu esaki gobierno a introduci un gesto na tur entidad envolvi pa sigura cu nan tin suficiente tempo pa prepara nan mes riba e cambionan importante aki. E medida aki no ta conta pa e companianan nobo cu ta keda institui desde 1 di januari 2012. Esakinan mester cumpli cu nan obligacion di deposita ambos documento pa promer biaha na 2013, pa mas tarda 8 luna despues cu nan aña economico (boekjaar) termina. Pa e copia di registro di accionista ta conta tambe cu esaki mester keda entrega dentro di ocho luna despues cu e aña economico termina, es decir promer cu ultimo dia di luna di augustus si e aña economico ta core di januari pa december. Pa mayor conveniencia ta inclui aki bao un resumen di e obligacionnan aki segun tipo di compania y fecha di institucion.

E obligacion aki lo encera cu cada compania mester percura pa e cuenta anual ta redacta y aproba, dentro di ocho luna despues cu aña termina (a menos cu tin un prolongacion di e periodo aki). E cuenta anual aki mester consisti por lo menos di un balanza, cuenta di ganancia y perdida y un memoria explicativo di e documentonan menciona. E cuenta anual pa un empresa por ser elabora pa e empresa mes, pero tambe por scoge pa laga otro entidad, manera un accountant of administratiekantoor haci esaki. Dentro di ocho dia despues di aprobacion di e cuenta anual esaki mester ser deposita na Camara di Comercio. E empresa mes por indica si e cuenta anual deposita ta confidencial of ta accesibel pa publico. Den e promer caso

KvK lo percura pa e documento bay den e parti confidencial, y den caso cu e empresa no tin obhecion pa publico por mire, e ta keda añadi na e file publico di e compania.

Tambe ta stipula den mesun ley aki cu mester traha y mantene un registro di accionista (aandeelhoudersregister). Ta obligatorio pa entrega un copia di e registro aki na KvK un vez pa aña, tambe dentro di ocho luna despues cu aña economico termina, incluyendo e cambionan cu a tuma lugar den e ultimo aña. Den e registro di accionista ta registra entre otro nomber y adres di tur accionista, documento di identidad, y e tipo y cantidad di accion cu nan tin riba nan nomber. Mester mantene e registro up to date, anotando tur cambio cu ta tuma lugar den propiedad di accion.

Ademas e ley aki ta atende e asunto di “accion na portador” (aandelen aan toonder, bearer shares), cual ta un fenomeno menos general caba. Desde hopi aña Ministerio di Asunto Economico no ta acepta compania cu “aandelen aan toonder” mas ora di otorga permiso pa opera na Aruba y esaki tabatin su efecto riba existencia di e tipo di accion aki. FATF ta mira circulacion di accion na portador como un peligro considerable pa cu labamento di placa y financiamento di terrorismo.
E ley ta stipula un periodo di tres aña den cual por converti e accionnan di e tipo aki pa accion riba nomber (aandelen op naam, registered shares). E accionistanan cu no a keda converti nan accionnan no por haci uso di nan derechonan legal tanten nan no registra y laga converti e accionnan den accion riba nan nomber.

Den un siguiente recado di prensa KvK lo elabora riba otro aspecto di e ley aki, entre otro e stipulacionnan nobo den Ordenanza di Registro Comercial (handelsregisterverordening). Tambe ta informa cu diamars 24 di januari 2012 KvK lo tene un charla informativo riba e ley aki cu participacion di Directie Wetgeving. Inscripcion pa e charla aki por ser haci na: This e-mail address is being protected from spambots. You need JavaScript enabled to view it

Camara di Comercio y Industria Aruba
10 Januari 2012