Connect to Us LinkedIn Youtube RSS

25-2011 - KvK: Desafio Economico pa 2012
  • PDF
  • Print
  • Email

Oranjestad – Aña 2011 a trese cierto recuperacion di economia di nos país. Esaki principalmente debi na e regreso den produccion di e refinería di Valero y e implementacion di varios proyecto di construccion y restauracion di banda di gobierno. Tambe tabatin un mehoracion den e cantidad di turista di estadia cu a percura, segun cifra di autoridadnan turístico, pa un aumento di yegada di turista “stay over”. Banda di esaki den turismo crucero no a mira un aumento similar manera den esun di hospedahe. Pa 2012, consolidacion y eventual aumento di mercado turistico lo mester bin di e mercado suramericano, especialmente Brasil, ya cu recuperacion di mercado americano mester mas tempo y esun europeo ta keda un incertidumbre ainda.
Desde inicio di 2011 refineria di Valero a bolbe den operacion y tabatin algun contratiempo pa motibo di incidentenan cu temporalmente a stroba produccion. Mientras tanto e plannan pa converti e proceso di destilacion pa uso di Liquefied Natural Gas (LNG), loque lo haci e proceso aki mas rentable, ta bira urgente. Situacion di prijs di crudo pa e refineria por funciona, tambe ta tresiendo su retonan. Mientras crudo pisa ta birando un parti mas grandi cada vez di e mercado global, mas refineria nobo ta biniendo den operacion cu ta handle crudo pisa. Esaki ta haci cu prijs di crudo pisa no ta mucho mas abao cu crudo “light sweet” y no ta duna e tipo di refineria na Aruba un margen favorable pa traha cune.

Pa loque ta e cifranan di registracion di empresa nobo na KvK, por bisa cu e panorama no ta varia tanto di loque ta mira di aña 2009 y 2010. E bahada den registracion desde 2008 na un nivel bao di 1200 empresa nobo pa aña a continua na 2011 tambe. E cifranan aki riba nan mes no ta base pa saca conclusion tocante desaroyo di GDP na 2011, ya cu crecimiento parcialmente ta bin di empresa nobo, y mas tanto di esnan existente. Den e anexo cu ta acompaña e relato aki, por mira e cifranan di registracion di Registro Comercial pa aña 2011, te cu luna di november.

Riba escenario internacional tabatin bastante turbulencia durante 2011. Entre otro causa pa e crisis europeo alrededor di e debenan insostenible di varios país den zona di Euro. Aunque cierto medida a tuma lugar caba pa e actornan principal manera Grecia y Italia, asumiendo nan responsabilidad pa trese nan presupuesto y gastonan den un cuadro mas realistico, esaki no a termina e crisis di confianza di mercadonan financiero den e capacidad di e paisnan europeo pa resolve nan problemanan. Hasta ta existi e posibilidad cu varios país clave den e zona di Euro manera Francia lo por mira un downgrade den nan categoria cerca e institucionnan cu ta valora solidez financiero di entre otro paisnan soberano, manera Fitch Ratings y Standard & Poor’s. E inestabilidad na Europa ta parce di ta continua na 2012 y por bay tin su efecto riba economia mundial.

Di otro banda, nos partner economico principal Estadonan Uni, ta termina aña cu cierto crecimiento economico modera di 1.8% di GDP, cu reduccion cauteloso di tasa di desempleo y mas confianza di e consumidor en general, specialmente den venta di fin di aña. E mehoracion di economia americano significa cu aña 2012 por ser mira cu algun confianza, aunque desaroyonan na Europa y Asia (especialmente desaroyo menos rapido na China y India) por tin influencia riba exportacion di producto y servicio americano. Tambe mester tene cuenta seriamente cu e papel cu petroleo ta hungando den economia mundial. Di un banda e crisis europeo y un economia chines cu a baha su ritmo di crecimiento cu tabata riba 9% di GDP pa aña, a causa un presion riba prijs di crudo. Di otro banda, turbulencia den e paisnan arabe ta sigui influencia prijs den otro direccion pa motibo di posible perdida di produccion y su efecto riba oferta global di combustible.

Banda di e notanan positivo menciona, tin cierto señal na nivel local tambe cu ta mustra preocupante. Esaki ta principalmente posicion financiero di gobierno, cu aparentemente no a logra mas stabilidad den e aña cu ta cabando. Esey ta debi na e hecho cu no ta mira un crecimiento sustancial di entrada di impuesto pa 2011, unda cu entrada di BBO y invoerrechten a aumenta, pero di otro banda ta mira un caída den loonbelasting. Tambe compromisonan financiero nobo relaciona cu indexering cu mester ser financia di un of otro manera pa nan no aumenta e deficit existente. A comprende cu gobierno ta desea di compensa e gastonan aki cortando otro caminda den presupuesto pa 2012. Esaki no ta resulta un tarea facil mirando cu hustamente un gran parti di e gastonan gubernamental ta relaciona cu salario, otro gasto di personal y gasto di “bienes y servicio”. Hunto e gastonan total aki di e aparato gubernamental ta consumi casi 100% di entrada di belasting, mientras pa 2011 y pa 2012 no ta spera tanto entrada extra incidental, manera tabata e caso na 2010 (Afl. 211 miyon extra di Valero di BBO atrasa). Hopi lo depende di e apoyo cu gobierno hulandes por ofrece den cuadro di e protocol firma recientemente unda ta bay yuda gobierno di Aruba cu refinanciamento di su debenan. Mientras tanto, con e debenan a sigui desaroya durante 2011 y con e perspectivanan ta pa 2012, lo ta clave pa determina mehoracion di e situacion financiero di país Aruba. Banco Central ta constata pa promer mitar di 2011 caba un crecimiento di debe publico cu ta surpasa 57% di GDP.
Resumiendo por bisa cu Aruba su desaroyo na 2012 tin su desafionan y ta depende grandemente di crecimiento di turismo, continuacion di refineria di Valero, y mantenimento di gasto di gobernacion dentro di limite aceptable.


Aruba, 28 di december 2011
Camara di Comercio y Industria (KvK)

alt

alt

 

By orbitalnets.com