Connect to Us LinkedIn Youtube RSS

09-2019 - KvK ta organisa un anochi di informacionencuanto haci negoshi cu Panama
  • PDF
  • Print
  • Email

Oranjestad – Diamars 6 di februari ultimo Camara di Comercio y Industria di Aruba (KvK) den colaboracion cu Embahada di Reino Hulandes na Panama a organisa un anochi informativo pa tur comerciante cu tin interes den haci negoshi cu Panama. E enfoke tabata pa e sectornan di logistica y maritimo cu a wordo invita pa atende e evento aki. E interes tabata halto mirando cu por a aprecia un sala completamente yen.

E anochi a brinda e oportunidad pa tur esnan presente haya sa mas encuanto e oportunidadnan cu ta existi via e ‘hub di Americas’. Tambe a trece dilanti informacion encuanto proyectonan cu ta na caminda y e oportunidadnan cu e ta crea. Panama actualmente ta inverti den desaroyo di servicionan di logistica cu ta ofrece mas balor agrega y tambe un sistema mas eficiente pa uzo intermodal di transporte. Esaki ta haci cu ta crea maximo uzo di e expansion di e canal cu a tuma luga na 2016 y ta duna Panama un bentaha pa bira e ‘hub regional pa  distribui alimento’.
 
Presentacion di anochi
Sra. Sonja Velthuizen, director di KvK, a hiba palabra y a bisa bon bini na tur e esnan presente. Sra. Velthuizen a splica riba e importancia di e biahe comercial y e oportunidadnan cu esaki ta brinda nos comunidad empresarial. Durante e anochi, sr. Jurriaan Middelhoff, hefe di Departamento Economico di e Embahada di Reino Hulandes na Panama, a duna un splicacion con e embahada por asisti e comerciante local pa por participa den e desaroyo aki. Asina aki e embahada ta organisa entre otro biahe comercial cu ta enfoca riba tema manera (agro)-logistica y maritimo di 17 maart te cu 21 di maart. Mas informacion por haya na e webpage www.internationaalondernemen.nl/en/agenda/handelsmissie-naar-centraal-amerika-17032019-0000-panama-stad-and-san-jos.
 
Sr. Middelhoff a elabora riba e economia di Panama y con esaki a desaroya den e ultimo añanan. E la conta riba e expansion di e aeropuerto Tocumen, e expansion di canal di Panama y tambe e desaroyo di areanan comercial manera e Zona Liber di Colon. E publico presente a siña un tiki mas di e cifras encuanto haci negoshi cu Panama hunto cu algun conseho riba e posibilidadnan comercial. E la elabora riba e beneficionan y tambe e otro aspectonan cu tin cu tene cuenta cune ora di haci negoshi. Siguientemente e la splica con Embahada Hulandes na Panama ta colabora y duna apoyo na negoshinan cu kier haci negoshi cu Panama. Tambe e la duna un bista di negoshinan Hulandes cu ta estableci y ta activo na Panama. Y pa clausura su presentacion e la duna un indicacion di e oportunidadnan di export y import cu por wordo crea entre Aruba y Panama.
 
Esnan presente a haya informacion extenso y KvK ta spera di mira nos comerciantenan probecha di e oportunidad aki y expande nan lasonan comercial cu Panama. KvK ta duna hopi aprecio y balor na oportunidadnan manera e anochi informativo aki mirando cu e ta contribui tambe na e pensamento di “Trahando hunto” y di e forma aki hunto nos hiba Aruba dilanti. 
Pa mas informacion por bishita e pagina online di KvK:  www.arubachamber.com/downloads/chamber-news/chamber-informs/1316-info-night-doing-business-in-panama.
 
Aruba, 11 di februari 2019
Camara di Comercio y Industria (KvK)
 
 
 

By orbitalnets.com