Connect to Us LinkedIn Youtube RSS

37-2018 - Curso empresario indepencinete chikito/mediano a cuminsa
  • PDF
  • Print
  • Email
Oranjestad – Diamars 15 di october a start sali e di cinco edicion di Empresario Independiente,  e curso di Camara di Comercio y Industria di Aruba (KvK) enfocando riba e empresario cu kier expande su conocemento comercial y start un negoshi. Esnan cu ta participa lo haya informacion cu lo yuda desaroya nan conocemento pa cuminsa of maneha nan propio negoshi.
 
Sra. Sonja Velthuizen, directora di KvK a duna tur e cursistanan un bon bini y a elabora riba kico por spera nan pa e siguiente lunanan durante e curso Empresario Independiente. Sr. Benjamin Romero tambe a duna un presentacion riba su buki over historia di koffie na Aruba y a elabora riba su experiencia como empresario.
 
Pa e siguiente lunanan e curso Empresario Independiente ta brinda e cursista diferente materia pa haya conocemento den tur aspecto cu ta di importancia pa maneho di un negoshi. KvK a diseña e curso di tal forma cu durante e periodo di 8 luna total (te cu juni 2019) e cursista lo amplia su conocemento riba tereno di mercadeo, legislacion, finanzas y administracion, impuesto, management, tecnica di benta, servicio na cliente, business planning y otro puntonan relevante pa maneha un negoshi na Aruba. E ta un curso interactivo y cada cursista lo por di e forma aki ta miho prepara pa su idea of negoshi y haci esaki uno realistico y sostenibel. Tur docente durante e curso ta expertonan y profesionalnan cu conocemento amplio den nan ramo. Un certified business coach lo duna coaching personal na e cursistanan na final di e curso pa asina nan por start nan negoshi.
 
E curso a desaroya di tal forma cu e programa actual ta cuminsa cu compila un business plan. E cursistanan lo haya tur guia necesario pa bay skirbi nan business plan. Na final di e curso lo mester duna un presentacion di e business plan aki y tur participante mester haci un examen teoretico pa por gradua exitosamente. E business plan lo wordo presenta na un hurado cu ta inclui un representante di Qredits Aruba y di e forma aki e cursista cu gradua por bin na remarke pa financiamento di su negoshi via Qredits.
 
E graduadonan lo ricibi nan certificado, cu lo tin balor comparabel cu e “middenstands-diploma” na Hulanda. KvK lo inclui den su registro di negoshi cu e cursista a termina e curso Empresario Independiente cu exito y esaki lo refleha tambe den e informacion di su empresa den e registro di KvK. E curso ta na Papiamento y lo dura 8 luna, pues te cu juni 2019. Dos biaha pa siman lo tin les di 2 ora y mei den e auditorio di KvK y durante e curso e participantenan lo haya e guia y informacion necesario. 
 
Tur cu ta desea haya mas informacion por tuma contacto cu departamento di Business Information & Support (BIS) na This e-mail address is being protected from spambots. You need JavaScript enabled to view it of yama na 582-1566 ext. 30/35. E ta un oportunidad unico pa haci bo soño di tin bo mes un negoshi un realidad. KvK ta desea esnan cu lo bai participa na e curso hopi exito y cu nan futuro planificacion di nan negoshi.
 
 
Aruba, 17 di october 2018
Camara di Comercio y Industria (KvK)
    
 

By orbitalnets.com