Connect to Us LinkedIn Youtube RSS

41-2017 - Sesion fructifero di KvK cu empresarionan den sector di construccion
  • PDF
  • Print
  • Email
Oranjestad –  E sector di construccion ta un di e seccionnan mas activo y mayoritario di Aruba. For di cifras di registro di Camara di Comercio y Industria (KvK) por mira cu e sector aki mayoria bes ta den e top sectornan cu tin registracion di negoshi nobo. Den e sector di construccion tin hopi movecion y varios biaha KvK ta haya pregunta of keho di empresarionan den e sector aki. KvK ta den contacto cu tur sectornan pa asina haya un bista di kico ta e problemanan y obstaculonan cu nan ta confronta cune y asina wak con KvK por brinda ayudo y asina logra cu tin un mercado y competencia sano. 
E sesion tabata uno habri caminda tur esnan presente a haya e oportunidad di trece nan punto dilanti y den un discusion liber por a intercambia opinion y idea. Tin varios preocupacion cu a wordo treci dilanti y KvK a tuma nota di tur esakinan pa asina formalisa e puntonan y hiba esaki pa e stakeholders concerni manera Parlamento di Aruba y e Minister nombra cu lo ta encarga cu asuntonan relaciona cu leynan laboral y otorgamento di permiso. 
 
E sector di construccion ta opina cu mester warda mucho hopi pa haya contesta di parti di departamentonan gubernamental. Nan ta mira cu inversionistanan di afo hopi biaha ta perde e animo pasobra documentonan no ta keda cla y ta opta pa bay otro caminda cu nan inversion of proyecto. Haya un prestamo di banconan comercial ta casi imposibel. E rekisitonan ta mucho stricto y no ta haci posibel pa ehecuta proyectonan pa falta di fondo. Di e forma aki ta indica tambe cu no tin incentivanan fiscal pa compensa pa e condicionnan aki. 
 
Nan a ripara cu actualmente permisonan ta on hold pa motibonan ya caba conoci y pues ningun proyecto cu ta pendiente di haya permiso pa trahadonan stranhero por continua. Tanten cu no tin claridad riba esaki trabounan ta keda pega.
 
Tin opinion mixto encuanto trahadonan ilegal den construccion. Tin cu ta opina cu e trahadornan legal (local) no ta haci trabou di calidad pero esun ilegal si. Mayoria trahado ilegal ta procedente di Venezuela of Colombia. E trahado ilegal sa tin e capacidad y experiencia di e trabou cu tin cu wordo haci. Y a wordo opina cu e local cu a caba scol no tin e experiencia of e mes un animo cu esun ilegal. E proceso via DIMAS ta haci cu un trahado ilegal cu por ta un bon trahado mester keda ilegal pa via di tramitenan y no ta yega na haya permiso di residencia of trabou.
 
Un idea cu nan a trece dilanti ta pa laga e trahandonan ilegal haci un curso special pa por cumpli cu e certificacion y cu nan permiso ta haci cu nan por keda pa 3 aña si nan tin trabou, ta cumpli cu cierto reglanan y cu e contratista ta esun responsabel si algo pasa cu e persona.
 
Pa esnan cu a termina EPB, un idea ta pa duna nan e oportunidad di haya experiencia door di obliga un trahador (ilegal) cu experiencia ta su guia y asina comparti tecnica y conocemento di construccion.
 
Hopi ta opina cu Aruba Investment Agency (Arina) ta un bon iniciativa pa trece y guia inversionistanan di afo pero nan ta haya cu asina mes nan ta keda pega ora di pidi permiso of purba cumpli cu cierto rekisitonan.
 
E educacion cu tin di haber cu construccion actualmente ta na Hulandes, siendo cu den practica e idioma cu ta mas papia ta Papiamento, Ingles of Spaño. Esaki tambe ta crea obstaculo pa esun cu tin dificultad cu e idioma Hulandes. Educacion na Aruba mester ta mas miho conecta cu e deseonan y rekisitonan di e mercado laboral.
 
E trabou den sector di construccion ta stigmatisa como uno inferior. Esnan presente ta di opinion cu hopi Arubiano no ta kies asina lihe pa bira un metsa por ehempel. Nan ta prefera keda sin tuma e trabou pasobra esey ta algo cu stranhero so ta tuma. E pago por ta bon pero asina mes hopi biaha ta stranhero so ta tuma trabounan aki.
 
Otro idea cu a bin dilanti ta e colaboracion entre e islanan. Asina aki por intercambia forsa laboral y tambe experticio. Den un situacion manera den cua Sint Maarten ta aden aworaki ta uno caminda cu por wak si e posibilidad tey cu por manda trahado y asina logra comparti conocemento y crea experiencianan nobo.
 
KvK a finalisa e sesion recapitulando e puntonan cu a resalta y lo bay hiba esaki dilanti pa por yega na solucionnan. Tambe KvK lo organisa un followup meeting y ta bay invita stakeholders pa nan por ta presente y asina facilita e proceso y intercambia ideanan.
 
Un danki ta bay na tur esnan cu a atende e sesion y ta spera di conta cu nan presencia mas biaha den futuro. Ta por medio di sesion manera esaki por yega na atende cu e obstaculonan y yega na un posibel solucion. KvK lo sigui haci lo maximo pa mehora e comercio di Aruba y crea un mercado saludabel pa tur industria local.
 
 
Aruba, 10 di november 2017
Camara di Comercio y Industria (KvK)
  
 
 

By orbitalnets.com