Connect to Us LinkedIn Youtube RSS

08-2017 - Camara di Comercio ta informa riba desaroyonan actual
  • PDF
  • Print
  • Email
Oranjestad –  Recientemente Directiva di KvK a tene un reunion cu fraccion di MEP y respectivamente tambe cu fraccion di AVP caminda a discuti riba diferente topico cu ta importante pa pueblo di Aruba. 
A intercambia idea cu ambos fraccion riba iniciativanan y incentivonan pa diversificacion economico y diferente puntonan pa haci start up un negoshi mas accesibel. A elabora riba e situacion den Caya Grandi y algun ideanan pa mehora e situacion actual. Relaciona cu esaki tambe a bin dilanti e punto encuanto guia y financiamento pa ‘young entrepreneurs’. Pa por yuda e empresario ta importante pa simplifica e otorgamento di permiso pa haci negoshi y simplifica e proceso di incorporacion di un forma legal. A toca e tema di educacion di nos hobennan pa mercado laboral y tambe e aspectonan social. Durante e reunionnan a intercambia hopi informacion pa cu e topiconan menciona y a bai den un bon ambiente. Ambos fraccion ta desea y ta mira e necesidad pa pronto reuni un biaha mas cu Directiva di KvK pa sigui elabora riba e topiconan cu a trece pa dilanti di ambos banda.
 
Un di e puntonan pa 2017 cu KvK ta considera hopi importante ta e desaroyo di Caya Grandi. Hopi negoshi den Caya Grandi tin dificultad pa mantene nan benta na un bon nivel y ta ripara cu poco poco mas negoshi ta cera nan porta pasobra e bentanan a baha mucho hopi pa por keda habri. Pa cu e situacion aki KvK tin estudionan andando y tambe ta reuni cu diferente gremionan y comerciantenan pa asina yega na un solucion pa e sobrevivencia di Caya Grandi. Tin hopi obstaculo manera diversificacion di e mesun tipo di negoshi tur caminda rond Aruba cu ta satura e mercado local. Huur di localidad halto ta contribui na comerciante busca un opcion mas economico pa nan negoshi den districtonan. Ta importante pa traha na solucionnan cu lo haci Caya Grandi atractivo tanto pa e comerciante como e consumidor y mantene e inversion haci pa embeyece e Caya Grandi.
 
Den e mundo moderno, comercio tambe ta conoce un factor nobo cu ta e-commerce. KvK ta haya importante pa comercio local por participa y haci uzo di loke e-commerce ta ofrece. E ley encuanto e-commerce ta di sumo importancia mirando cu pa hopi comerciante e ta significa un competencia inhusto. E posibilidad pa cumpra producto y haci pago online na florin di Aruba di bo compra ta e direccion unda cu nos mester bai. Den esaki KvK ta purbando na facilita e rekisitonan pa crea un plataforma local pa e-commerce den nos sistema bancario y financiero. 
 
KvK ta representa e empresario local y ta na altura di e contratiemponan cu hopi empresario (chikito y grandi) ta haya nan mes enfrenta cune na momento di kier haci nan negoshi un realidad y tumando e pasonan legal. KvK lo traha hunto cu e diferente instancianan pa asina sigui purba na elimina e ‘red tape’ cu hopi bes ta trece contratiempo y te hasta impedi cu un negoshi por forma su mes.
 
 
Aruba, 23 di februari 2017
Camara di Comercio y Industria (KvK)
 

By orbitalnets.com