Connect to Us LinkedIn Youtube RSS

KvK: RAPPORT FATF Y SU CONSECUENCIANAN
  • PDF
  • Print
  • Email

E rapport di Financial Action Task Force di november 2009 cu ta den atencion publico durante e ultimo simannan, tin relacion cu y consecuencia pa e trabao di Camara di Comercio y Industria (KvK) tambe.

KvK tabata un di e instancianan cu a reuni cu e delegacion di FATF cu a bin haci su evaluacion na Aruba y actualmente ta envolvi den e proceso pa logra e cambionan cu mester bin den e sistema di supervision di nos economia y principalmente e fluhonan financiero den esaki. Dos fenomeno importante ta hunga un papel: labamento di placa ilicito y financiamento di terorismo. Control riba fluho financiero, den ambos caso, no ta concerni solamente compania comercial, ni tampoco solamente e sector offshore, sino tur e gama di organisacion existente, incluyendo NV, AVV, VBA, y e formanan legal manera fundacion y asociacion tambe. Esaki ta haci necesario pa diseña un cuadro legal cu ta acapara tur e formanan legal bao di regla mas uniforme posible.

Reglanan general y transparente

Control y supervision riba diferente tipo di organisacion ta cuminsa cu nan registracion, y esey ta algo cu ta toca trabao di KvK directamente. Pa implementa regla mas estricto pa tur organisacion mester crea registracion uniforme. Den Reino Hulandes ya caba tanto Hulanda como Antiyas a pasa pa crea un registro unico, general, pa tur tipo di organisacion y ta parce logico pa Aruba tambe bay den e direccion aki. E tin e ventaha tambe di percura pa un registro basico y confiable cu ta beneficioso pa henter gobernacion y pa comunidad en general.

Esaki lo significa cu mester bin cambio den e leynan cu KvK ta implementa, specificamente Handelsregisterverordening y Stichtingenverordening, cu lo mester integra den un ley unico, mientras cu mester integra tambe otro forma legal, manera asociacion (vereniging) cu actualmente no tin obligacion legal di registracion. Importante tambe ta introduccion di Boek 2 di Codigo Civil, cu na Hulanda y Antiyas a keda introduci caba y cu ta duna un cuadro legal uniforme pa e diferente formanan legal. E cambionan den ley di registro ta parti di un plan general pa update tur e leynan cu ta concerni KvK, pa cual tin un proyecto special pa renoba esakinan. Ley di registro sin embargo, a bira urgente a base di e rapport di FATF. Cu esaki naturalmente nos no a keda cla, pasobra ta keda tur e ahustacionnan cu mester bin den trabao di varios instancia di supervision.

AVV: aboli of cambia regla?

Un di e puntonan central di e discusion ta e posicion di e vehiculo legal ‘AVV’ (Aruba Vrijgestelde Vennootschap), pa cual hasta tin opinion pa mehor elimina esaki completamente. KvK ta di opinion cu esaki no ta necesario ni recomendable, mirando e efecto negativo cu eliminacion tambe lo por tin pa reputacion di Aruba como dunador di servicio financiero. Pero mester ta consciente cu si e AVV ta keda existi, esey lo ta solamente posible bao di un regimen di supervision hopi mas estricto, cu practicamente lo mester conta pa tur forma legal (NV y VBA tambe) cu nos sistema legal conoce. Loke mester comprende ta cu di awor en adelante no por mantene un sistema di registracion cu miles di compania estableci na Aruba, sin cu informacion basico di nan quehacer comercial y financiero, inclusive informacion di accionista y beneficiario final, ta conoci.

E rapport di FATF ta señala cierto problema cu ta toca varios di nos formanan legal, entre otro e existencia di “bearer shares” (“acciones al portador”, “aandelen aan toonder”) cu ta conta pa AVV, pero pa NV tambe. E VBA introduci na inicio di 2009 ya caba a bin cu prohibicion pa emiti bearer shares. Ta inevitable pa bin cu regla nobo pa esaki y den mesun rosea mester constata cu e Boek 2 di Antiyas tambe keto bay ta permiti ‘bearer shares’ pa e NV Antiyano. Aki ta unda Aruba mester mehora y coregi e capitulo di Codigo Civil aki prome cu nos introduci esaki.

Prepara pa futuro

Den e mundo cu nos ta biba aden actualmente a bira imposible pa ignora cierto desaroyo cu ta oblige nos como pais pa implementa reglanan internacional cu ta diseña pa limita peligro di labamento di placa y financiamento di terorismo. Pero Aruba no ta e unico cu mester cumpli y nos mester analisa con otro pais ta resolve e contradiccion di con cumpli di un banda cu reglanan internacional, y con di otro banda crea un ambiente atractivo pa inversionista internacional y local dentro di e cuadro di regla ey. Pa haci esaki, mester analisa e producto di servicio financiero cu Aruba ta ofrece, y busca e alternativanan cu tin den e pakete aki, pasobra esaki ta unda por haci cambio. Pa cuminsa, esaki ta significa un cambio considerable den nos regimen fiscal, cu actualmente no ta suficientemente atractivo, ni pa e inversionista internacional, ni pa esun local. Aruba tin mas trabao pa haci cu solamente cumpli cu FATF.

 

By orbitalnets.com